Avlsplan super

I denne besetninga er det spredt kalving gjennom heile året, og avlsrådgivar Hans Snerting er innom to gonger årleg for å gå gjennom alle aktuelle dyr som skal inseminerast. Han set i samråd med paret opp ein detaljert avlsplan der målet er å finna ein okse som passar til kua, slik at avkommet kan bli endå betre enn foreldra.

- Me kan setja krav til avkom på opp til tre eigenskapar, men me bør ikkje setja urealistiske krav, for då innskrenkar me oksevalet veldig, eller det finnst ikkje oksar som kan innfri, smiler den humørfylte avlsrådgivaren.

Ingrid Birgitte Holm og Tore Kristian Kristensen kjøper tenesta ­avlsplan super frå avlsrådgivaren i Tine, og i denne tenesta ligg det at avlrådgivaren går gjennom kvar enkelt ku saman med produsentane, og saman vert dei einige om kva eigenskapar dei vil forbetra hjå avkommet.

- Me brukar ein del tid på reproduksjonsarbeidet, og det har me att for, seier Tore. Han seier vidare at dei har valt å bruka avlsrådgivar for å tena meir pengar, og i det ligg det at det er både lønnsamt og artig å ha ein velfungerande besetning med god dyrehelse som fungerer godt med fri kutrafikk i lausdrifta. Det er også veldig triveleg å gå i fjøsen når ein har ei besetning som fungerer godt.

Det er både lønnsamt og artig å ha ein velfungerande besetning med god dyrehelse

GS-testar alle hodyr

Ingrid og Tore GS – testar konsekvent alle kvigekalvar som vert fødd i besetninga.

GS-testing vil seia at ein tek ein vevsprøve frå øyra, og i denne vevsprøven finn ein DNA (arve­materiale/gener) som viser kva eigenskapar kalven er god/svak på, og i tillegg kan ein sjå om avstamminga stemmer. Kalven får 50 prosent sikrare avlsverdi enn med tradisjonell avlsverdiberekning, og når ein set opp avlsplan til GS-testa dyr, er det lettare å lukkast med å finna ein okse som gir god avlsmessig framgang for avkommet. Ein anna fordel med GS-testing av alle kvigekalvar, er at ein kan velja ut dei beste ­kvigene og til dømes bruka kjønnsseparert sæd på desse. På denne måten sikrar ein seg hodyr frå dyra med best arvemateriale.

- Me har ikkje nyttiggjort oss av ny teknologi som kjønnsseparert sæd eller embryo endå sidan me alltid har hatt nok påsett av kviger, men når me får sjå at andre får gode erfaringar, så vil me bruka ny teknologi me også, seier Ingrid.

- Me er trønderar veit du, og me er tilbakehaldne og ligg ikkje i front av natur, ler avlsrådgivaren.

Ein anna stor fordel med GS-testing, er at når ein har testa meir enn 10 kvigekalvar, får ein gratis eksteriørvurdering av kvigene frå avlsrådgivar, og denne vurderinga går rett inn i Kukontrollen som igjen brukar dataene til å velja rett okse ved inseminering. I besetninga til Ingrid og Tore, kjem Hans to gonger i året for gratis eksteriør­vurdering for å få med alle dyra.

Eit målrette avlsarbeid på å få fine “robotjur” har bore frukter

God robotbesetning

I 2016 flytta besetninga inn i nytt fjøs med mjølkerobot. Eit målrette avlsarbeid på å få fine “robotjur” har bore frukter.

- Me har fått ei veldig god robotbesetning, spenane på alle er bra, og no fungerer alle kyrne i mjølkeroboten, seier Tore fornøgd. Avlsrådgivar Hans viser i programmet alle jurparametrane som kyrne vert målt på, og ved å gå inn her kan ein velja ut oksar som passar til kua for å forbetra avkommet i høve til kva indeksar mor og far har.

Målretta avlsarbeid ber frukter

Paret har utan tvil ein god besetning, og målretta avlsarbeid ber frukter i form av ein velfungerande robotbesetning som det er triveleg å jobba med. I år har i tillegg paret fått levert ein oksekalv til Geno, og det vert spanande å følgja denne framover.

- I tillegg til å bruka NRF-oksar, har me også lagt inn i avlsplanen nokre røde toppoksar frå våre naboland som Sverige, Finnland og Danmark, og desse bidreg også med gode gener utanfrå, seier avlsrådgivar Hans til slutt.